Frika nga bluzat e bardha! Mjekja në Vlorë alarmon: Një pacient me Covid në gjendje të rëndë refuzon shtrimin në spital Mesa duket frika nga spitalet ka bërë që një nga pacientët të refuzojë kurimin, pavarësisht gjendjes së rënduar në të cilën ndodhet. Në një prononcim për mediat, mjekja e qendrës shëndetësore nr 3 në Vlorë, Rajmonda Zoto ka treguar se një pacient i infektuar me koronavirus nuk pranon që të trajtohet në ambientet e spitalit.
“Në zonën tonë janë 11 raste Covid pozitiv. Njëri prej të cilëve është në gjendje të rëndë, është diabetik dhe ka refuzuar disa herë shtrimin në spital. Po e ndjekim në shtëpi me oksigjen. Ka pacientë që e ekzagjerojnë prej gjendjes së ankthit dhe janë jo të pakët personat që e kanë të domosdoshëm trajtimin. Ne bëjmë vlerësim të rasteve sepse i njohim pacientët dhe nëse duhet të kryejnë analiza konsultohemi me pneumologun dhe infeksionistin”, tha më tej ajo”,- tha mjekja.
