Në kuadër të afrimit të muajit të Bekuar të Ramazanit, Myftinia e Vlorës, zhvilloi një program fetar në ambientet e qendrës kulturore “Labëria” me titull: “Mirë se vjen Ramazan”.
Ky program mblodhi së bashku besimtarë të shumtë, imamë e myezinë të qytetit, veçojmë këtu pjesëmarrjen e Nënkryetarit të Komunitetit Mysliman të Shqipërisë, Z. Taulant Bica.
Nën një atmosferë të ngrohtë shpirtërore, aktiviteti u hap me leximin e disa ajeteve Kuranore nga Imami Ervis Bilali, për të vijuar më pas me fjalën përshëndetëse të Myftiut të Vlorës, z. Armand Asllani, i cili falenderoi të pranishmit për pjesëmarrjen dhe u ndal në veçoritë e muajit të Ramazanit si dhe mënyrën sesi duhet të presim e ta kalojmë ne si besimtarë.
Më tej, të pranishmit i përshëndeti edhe Nënkryetari i Komunitetit Mysliman të Shqipërisë, Z. Taulant Bica, i cili pasi falenderoi organizatorët për këtë event kaq të rëndësishëm, ndau me të pranishmit rëndësinë e këtij muaji të madh që po na afron.
Programi vijoi më tej me referimin e Myftiut të Sarandës, Z. Bledar Mulla, më pas me referimin e Dr. Petrit Leka dhe Imam Mirandi Shehajt.
Në këtë aktivitet nuk mumguan as surprizat nga fëmijet, të cilët na falën emocion me zërin e tyre të bukur duke kënduar Kur’an dhe poezi rreth muajit të madh të Ramazanit.
Lusim Allahun që të na mundësojë ta arrijmë muajin e madh të Ramazanit me shëndet të plotë, të na e lehtësojë agjerimin në muajin e Ramazanit dhe të na e pranojë atë!
