Vijon protesta e naftëtareve në Ballsh, të cilat janë në ditën e dytë të grevës së urisë. Pasi kanë kaluar një natë me reshje, dhe të ftohtë naftëtaret e Ballshit, kanë nisur dhe komplikacionet e para të shëndetit të tyre, e megjithatë thonë që nuk do të tërhiqen nga greva, pasi kërkesat e tyre janë të drejta.
“Nuk është e lehtë për një grua dhe për një nënë që të gdhihet në grevë urie. Aq më tepër që nuk kishim as ilaçet me vete, ka qenë një natë e dhimbshme dhe e vështirë. Shëndeti i shoqeve dhe imi nuk ka qenë i mirë, por jemi të detyruara që të marrim këtë vendim. I bëj thirrje ministres që të kthejë sytë nga ne, pasi nuk do të thyhemi kollaj.
Kam 34 vite që punoj si laborante në Rafineri, dhe jemi të gjitha me sëmundje të tjera, por kërkojmë pagat e prapambetura dhe rifillimin e punës. Sinqerisht nuk kam komunikuar me vajzat dhe me bashkëshortin, por jam shumë të vendosura për të qendruar këtu, se na ka çuar halli”, shprehet një prej grevisteve.
Gratë greviste shprehen se ato do të qendrojnë në grevë, deri në fund, dhe nuk do të pranojnë të zëvendësohen.
“Kryeministri të mbledhë njerëzit, dhe të na japë një zgjidhje, unë nuk shkoj dot në shtëpi, se kam dy vajza në shkollë, që kërkojnë lekë e libra, e nuk ua mundësoj dot”, shprehet më tej naftëtarja.
Mjekja e cila po viziton 10 gratë që kanë hyrë në grevë shprehet se gjendja e tyre nuk është fare e mirë, pasi shumë prej tyre vuajnë edhe nga probleme me ankthin, dhe me tensionin, dhe nuk mund të qendrojnë për shumë gjatë në një ambient të tillë të vogël dhe të mbyllur.
