Të gjithë dyqanet e rrobave kanë një protokoll të veçantë për të zbatuar për të parandaluar përhapjen. Me rihapjen që nga dje, përveç protokollit jeshil standart, që u publikua të shtunën e-albania, ka ndarë tashmë edhe rregullat specifike për këto dyqane. Kështu, tashmë është e ndaluar provimi i rrobave në dyqane, pasi kjo përbën rrezik infektimi.

“Prova e rrobave në kontakt fizik direkt me lëkurën duhet evituar. Prova rekomandohet të kryhet mbi rrobat ekzistuese kur është e mundur. Pas blerjes rroba duhet larë patjetër fillimisht e pastaj duhet veshur”,-sqarohet në rregullore.

Ditën e djeshme, u rihapën 17 lloje të biznesit përfshirë edhe shërbimin taksi. Dyqanet e veshjeve; Dyqanet e tekstileve; Dyqanet e këpucëve dhe artikujve prej lëkure; Dyqanet që tregtojnë mobilie; Dyqanet që tregtojnë pajisje të ndriçimit; Dyqanet të artikujve shtëpiakë; Dyqanet e luleve dhe bimëve; Dyqanet e kafshëve të shtëpisë dhe ushqimit të tyre; Dyqanet e pajisjeve elektronike; Dyqanet e lodrave për fëmijë; Dyqanet e pajisjeve sportive; Dyqanet e pajisjeve te tekomunikacionit dhe taksitë janë hapur në bazë të rregullave të rrepta për të evituar përhapjen e pandemisë COVID-19 dhe mbrojtjen e punonjësve dhe qytetarëve.