Kryeministri Edi Rama u bëri thirrje sot të gjithë banorëve që jetojnë në zonat rurale dhe që janë prekur nga tërmeti, që të krijojnë qendërzime që krijojnë komunitete. Në mbledhjen e Komitetit Kombëtar të Rindërtimit, Rama tha se “duke marrë përshembull Laçin, i cili ka një potencial goxha të konsiderueshëm dhe nëse bëjmë gjënë e duhur do të krijojmë jo vetëm kushte më të mira banimi për ata që humbën shtëpitë, por edhe një ekonomi lokale më dinamike”, tha Rama.
Ai tha se Laçi është një pikë që mbledh rreth 3 milionë turistë në vit dhe nuk bëhet fjalë vetëm për turistë të huaj që vijnë nga jashtë, por edhe nga vendi, që shkojnë në pikën e pelegrinazhit dhe e anashkalojnë komplet Laçin e sotëm sepse nuk ka asnjë lloj kushti dhe atraksioni. “Nëse ndërhyrja sjell energjinë e një transformimi si ndërhyrjet në shumë pika të tjera, si Korça, Vlora, Tamara, Malësia e Madhe ose Puka me siguri ne do t’i japim një mundësi të re edhe ekonomike sidomos familjeve që janë aty të angazhuara me biznese të vogla apo që mund të angazhohen edhe me mikpritjen si biznes”, tha Rama.
Kryeministri u shpreh se qendërzimet nga ana tjetër janë shumë të rëndësishme. “Ne duhet t’i ftojmë banorët e zonave rurale që të afrohen me njëri-tjetrin dhe të krijojnë qendërzime që krijojnë komunitete. Është shumë e thjesht epërsia e këtij modeli me modelin ekzistues. Nëse sot një familje në fshat e cila jeton larg shërbimeve duhet të nisë fëmijët për shkollë të ecin me kilometra të tëra, apo të çojnë një të moshuar që ka nevojë për shërbim parësor shëndetësor, nesër me qendërzimet kjo i mundësohet aty”, tha Rama. Ndërkohë, sipas tij, “pronën e tyre në fshat banorët e kanë dhe do të fitojnë edhe një tjetër më shumë”. “Thumana, një zonë shumë kritike nga pikëpamja e strukturës së vetë urbane e sociale me këtë ndërhyrje pa diskutim mund të bëhet një pikë referimi e vogël, por e rëndësishme në gjithë hartën e zhvillimeve të agroturizmit, duke pasur parasysh edhe liqenin që ka afër, në rast se arrihet qendërzimi”, tha Rama.
