Në datë 03.09.2021 pranë Pallatit të Kulturës Vlorë u organizua analiza 8 mujore me trajnerët e Klubit Shumësportësh Flamurtari me rastin e fillimit të sezonit të ri për disa kampionate zyrtare.
U diskutua dhe analizua gjëndja aktuale e ekipeve të basketbollit dhe volejbollit dhe plotësimi i dokumentacionit të duhur për federim në prag të fillimit të sezonit të ri 2021-2022.
Gjithashtu dhe për ekipet e tjera që kanë Kampionatet Kombëtare dhe Kupat e Republikës përgjatë muajve Shtator – Dhjetor 2021.
Nga drejtori i Klubit u kërkua një relacion i hollësishëm mbi gjëndjen e ekipeve nga secili trajner, pjesëmarrjen në aktivitetet zyrtare për vitin 2021 dhe rezultatet përkatëse si dhe objektivat për sezonin e ri , relacion i cili pasi të përpunohet do të dorëzohet dhe në Drejtorinë përkatëse në Bashkinë Vlorë përpara hartimit të Projekt Buxhetit 2022.
U la detyrë për trajnerët që nuk kanë dorëzuar pranë Klubit dokumentacionin për kualifikimet personale si liçenca apo kategori, ti sjellin ato brenda këtij muaji për të bërë të mundur plotësimin me dokumentacion të saktë të dosjeve të disiplinave të tyre .
Në mbyllje të takimit u diskutua në lidhje me ligjin Nr. 79/2017 “PËR SPORTIN”, me ndryshimet dhe kushtet që duhet të plotësojmë për të marrë pjesë në aktivitet zyrtare të federatave.
