Shuplaka të dorës të djersitura, nervozë dhe përzierje janë disa nga simptomat që shkaktohen nga shikimi i futbollit.
Në një studim të fundit, të realizuar nga Universiteti i Leeds, ka konfirmuar se shikimi i futbollit ka një ndikim pozitiv në shëndet. Ata analizuan 25 fansa të ekipit futbollistik të Britanisë së Madhe ‘Leeds United’, në mesin e moshave 20-62 vjeçe, përgjatë tri lojëve kyçe në kompeticionin ‘Championship’. Këta tifozë u monitoruan fizikisht dhe psikologjikisht përgjatë lojëve, për t’ua përcjellur tre faktorë kyç – rrahjet e zemrës, shtypjen e gjakut dhe gjendjen emocionale.
Pjesëmarrësit vendosën matës të rrahjeve të zemrës përgjatë lojës, gjersa shtypja e gjakut u mat në intervale të ndryshme kohore. Mbështetësve poashtu iu realizuan anketa të gjendjeve emocionale dhe u intervistuan pas lojëve për analizë psikologjike.
Rezultatet gjetën se një rritje e rrahjeve të zemrës gjatë lojës çoi në stres pozitiv – i ngjashëm me atë që përjetohet përgjatë ushtrimeve të moderuara kardiovaskulare – duke vërtetuar se shikimi i futbollit në të vërtetë është i dobishëm për shëndetin e përgjithshëm. Kur Leeds fituan, secilit fans iu ul niveli i shtypjes së gjakut. Ndërkaq, në terma të impaktit psikologjik, secili pjesëmarrës kishte një gjendje emocionale pozitive përgjatë 24 orëve pas fitores së ekipit të zemrës.
