Krejt e veçantë dita e sotme në Parkun Arkeologjik të Butrintit.
Skena e Amfiteatrit të gurtë antik, si asnjëherë më parë u kthye në një skenë me këngë e valle tradicionale nga disa prej shkollave të mesme të qarkut të Vlorës.
Organizuar nga Drejtoria Rajonale e Trashëgimisë Kulturore në bashkëpunim me Zyrat Vendore të Arsimit, edicioni i IV i “Gurra Folk Festival” bëri bashkë në Butrint gjashtë shkolla të mesme nga Vlora, Saranda, Delvina, Konispoli, Ksamili e Finiqi.
Rreth 200 nxënës, vajza e djem të veshur me kostume popullore tradicionale “pushtuan” me këngë e valle polifonike tempullin e lashtë mijra vjeçar të Butrintit të mahnitshëm.
Skena e mësuar në shekuj me dramat dhe tragjeditë shekspiriane u kthye sot në një mini kala Gjirokastre e ku magjishëm u bënë bashkë e folën me një zë trashëgimia kulturore materiale me atë shpirtërore.
Një demostrim i shkëlqyer i vlerave të trashëgimisë shpirtërore nga të rinjtë shkollarë, falë interesimit dhe punës së stafefe të shkollave të cilët edukimin përmes kulturës e realizojnë përmes dukurive e vlerave të qenësishme kombëtare.
Aktiviteti i sotshëm tregoi edhe një herë se trashëgimia jonë shpirtërore mbetet një vlerë e pa tjetërsueshme por edhe e transmentueshme nga të rinjtë në se bëhet pjesë e kurikulave shkollore por edhe fokus e vizion i institucioneve shtetërore të kulturës.
Butrinti tregoi njëherazi se institucionet përmes bashkëpunimit për realizimin e veprimtarive konkrete realizojnë modele që lënë gjurmë në breza e për breza.
I nderuar të isha pjesë e jurisë së këtij festivali garues së bashku me drejtorin e Muzeut Kombëtar të Pavarësisë, Istref Dobi dhe drejtoreshën e ZVA Sarandë, Majlinda Mavro.
Për këtë por më shumë për suksesin e këtij aktiviteti mbresëlënës, më duhet të falenderoj e uroj drejtorin e DRTK, Vlorë, Orgest Feimi.Nga Sejmen Gjokoli
