Në Shkozën e Kananit … Kanan tu prish bukuria, -Le të rrojë Shqipëria!.
-Është koha e 100 vjetori i Luftës së Vlorës dhe krahas nderimit për Epopenë e madhe, mbase do ishte mirë që të hidhej një vështrim edhe për gjëndjen fizike të monumenteve e lapidarëve që përjetësojnë këtë histori, nga më të jashtëzakonshmet e më të qashtër shqiptare. Po sidomos do të lypsej të vihej një dorë në bustet e heronjve të kësaj lufte… Me siguri, koha e pandemisë i pa mundësoi disa veprimtari apo dhe ndërhyrje restauruese por kjo s’do të thotë që disa gjëra të mos bëhen edhe më pas…
100 vjetori vjen vetëm një herë.
Ky është momenti që historia mban shënim nderimin që bën shteti apo pushteti, apo institucionet e individët që i zë hera në shënjimin e këtij Jubileu. I pari shekull, mbas ndodhisë… Të paktën tek busti i Kanan Mazes, edhe pse me portë të mbyllur e mes barit të gjelbërt, në vendvendosjen në vendlindje, nuk pashë të kishte “dorë” “100 vjetori”… Ndërkohë më shoqëron isua e këngës që populli i Labërisë ka kënduar e këndon:
…Kanan Mazia nga Shkoza, Me një nofull copa-copa, Kanan tu prish bukuria, -Le të rrojë Shqipëria! …dhe hajde e mos i ndero e mos u përkujdes për kësi lloj burrash që rrallë i vijnë Shqipërisë. Shkozë, 29.05.2020. Nga Sejmen Gjokoli
