Teksa dje doli raporti i Komisionit të Venecias për Presidentin, dhe të gjithë po prisnin reagimin e tij, Meta e ka kaluar në heshtje dhe nën frikën e shkarkimit ka bërë sërish apel për ndalimin e fluksit të madh të refugjatëve shqiptarë drejt Europës Perëndimore.
Kreu i Shtetit ka publikuar në profilin e tij artikullin e medias gjermane ‘’Deutsche Welle’’, ku theksohet se një valë e re emigrimi me 12 mijë shqiptarë po përgatitet të vërshojë drejt disa vendeve të BE-së, ndërsa 2 mijë të tjerë po tentojnë sërish të fitojnë statusin e azilkërkuesit.
Artikulli i ‘’DW’’ depërton në thellësi të realitetit të trishtë shqiptar ku zhvillimi ekonomik po shkakton pasoja negative dhe te lindshmëria, e cila është reduktuar nga 2.7 fëmijë për një grua në 1.6.
Meta reagoi dy ditë më parë për një tjetër sondazh të fondacionit ‘’Friedrich Ebert’’, e cila raportojne se 285 mijë shqiptarë kanë shprehur dëshirën për t’u larguar nga vendlindja.
Ndërkohë një ditë pasi Komisioni i Venecias në Draft Raportin për Presidentin Meta, tha se ky i fundit kishte shkelur Kushtetutën me dekretin për anulimin e zgjedhjeve lokale të 30 Qershorit, ka ardhur një reagim edhe nga zëdhënësi i Metës, Tedi Blushi. Sipas pretendimeve të Blushit ky vendim i Venecias nuk ishte një sekret pasi sipas tij këtë gjë e dinin nga radhët e qeverisë. Blushi ka shpërndarë edhe një video të ish-ministres Mimi Kodheli e cila thotë se Komisioni i Venecias kishte arsyetuar se Meta ka bërë shkelje. Kjo deklaratë është bërë më datë 10 shtator të këtij viti dhe zëdhënësi i Presidentit ka ironizuar duke e quajtur si një nxjerrje sekreti ‘para kohe’.
“Kur Mimi nxjerr sekretin para kohe…ha ha” shkruan Tedi Blushi
