Fiks Fare transmetoi mbrëmjen e djeshme denoncimin e Eljana Koçit, e cila akuzoi si mjekët e urgjencës ashtu edhe mjeken kardiologe për neglizhencë, gjë e cila solli humbjen e jetës së nënës së saj 62 vjeçare në spital.

Nga ajo çka Fiks Fare transmetoi u pa se nga neglizhenca e mjekëve për t’i dhënë ndihmën mjekësore në kohën e duhur e ndjera humbi jetën nga infarkti.

Por papërgjegjshmëria e stafit të Spitalit Rajonal Durrës shkon edhe më tej, pasi kartela mjekësore e së ndjerës përfundon në duart e një avokati pa dijeninë e familjarëve. Avokati njofton familjarët të shkojnë të marrin kartelën mjekësore.

Në një bisedë midis vajzës së të ndjerës me avokatin, ky i fundit shpjegohet se kartelën e ka gjetur poshtë derës së zyrës së tij.

Eljana i drejtohet spitalit, ku drejtori fillimisht i thotë se kartela është marrë nga një e afërme e familjes. Më pas ai del me një tjetër version ku thotë se do e gjejë fajtorin dhe motivin se pse është nxjerrë kartela nga spitali.  Drejtori i spitalit tregoi emrin e zonjës që kishte tërhequr kartelën, duke mos qenë e afërme e viktimës e pohuar nga Eljana, drejtori i spitalit tha se do ta ndiqte çështjen ligjërisht. Kartela mjekësore e një pacienti mund të tërhiqet vetëm nga familjarët dhe askush tjetër dhe të dhënat personale të çdo individi mbrohen me ligj.

Eljana kontakton me zonjën që kishte tërhequr kartelën e nënës së saj të ndjerë, kjo e fundit pohon se ja ka dhënë spitali. “Unë kam kërkuar kartelën e burrit, shkova dhe më dhanë këtë” i shpjegon ajo Eljanës.

Në këto kushte Eljana i drejtohet sërish Spitalit  Rajonal Durrës dhe pikërisht tek personeli që ka nxjerrë kartelën e nënës së saj. Ajo ishte sekretarja e spitalit dhe shpjegon se e gjitha ka qenë një gabim njerëzor, nuk është bërë me dashakeqësi “Më vrit nëse do, e bëmë pa dashje”.