Dita e nesërme, 5 Janar, shënon dhe lehtësimin e masave kufizuese në vendin tonë, me një zgjatje prej 90 minuta të orarit të lëvizjes në darkë. Prej ditës së nesërme aktivitetet do të mbyllen në orën 22:00 të mbrëmjes deri në orën 6 të mëngjesit pasues. Përjashtim nga ky rregull bëhet për personat që duhet të lëvizin për emergjenca shëndetësore, motive pune apo nevoja të domosdoshme. Sipas Komitetit të Ekspertëve, të njëjtës fashë orare i nënshtrohen edhe aktivitetet e bareve, e restoranteve.
Ndërkohë në prag të festave të fundvitit, Komiteti e shkurtoi orarin e lëvizjeve duke bërë që qytetarët të mos lëvizinin nga ora 20:30 deri në orën 6, por nga sot ky orar zgjatet deri në 22:00. Personat që lëvizin për arsye pune apo arsye të domosdoshme përtej këtij orari duhet të pajisen me autorizim përmes portalit e-albania. Prej disa ditësh numri i rasteve të reja ditore me Covid ka qenë në rënie, duke u reflektuar kjo dhe te numri i pacientëve të shtruar në spitale, por edhe te ata persona që ndërrojnë jetë.
