Personi i zgjedhur nga Rama për të drejtuar Ministrinë e Brendshme, Sandër Lleshaj ka dalë sot në një konferencë për mediat.
Ndërkohë që të gjithë ishin gjithë sy dhe veshë për të mësuar se çfarë do të thoshte Lleshaj në lidhje me ngjarjen e rëndë kriminale që tronditi Elbasanin mbrëmjen e djeshme, ku në një atentat mafioz tre persona humbën jetën, në fakt ministri i Ramës nuk tha asnjë fjalë për ngjarjen në fjalë.
Sandër Lleshaj në daljen e tij publike paraditen e sotme në vend që të fliste për Elbasanin, foli për ndalimin e lojërave të fatit.
“Duke filluar nga data 1 janar 2019. Dhe 1 janari fillon në orën 00.00, pra jo kur gdhihet, por që në 00.00 të datës 1 janar 2019, në territorin e vendit ndalohen disa veprimtari të lojërave të fatit si: bastet sportive, baste për gara në pistë, lojërat elektronike në distancë. Po ashtu ndalohen reklamat audiovizive për bastet sportive, publiciteti në median e shkruar, në shtypin sportiv, në faqet elektronike të tyre etj.
Me rëndësi të madhe është të kuptohet fakti që Policia e Shtetit, në rastin e këtij ligji është strukturë e ngarkuar drejtpërdrejt me zbatimin e tij.”-tha ndër të tjera Sandër Lleshaj, por pa thënë qoftë edhe një fjalë të vetme në lidhje me ngjarjen e rëndë të mbrëmjes së djeshme në Elbasan.
Mesa duket për ministrin e Ramës, lojërat e fatit “kërcënojnë” jetën e qytetarëve shqiptarë, më shumë sesa bandat kriminale që vrasin çdo ditë.
Sandër Lleshaj duket se do i “luftojë” bandat duke dhënë urdhëra qesharakë, si ajo për të ashtuquajturit “policët barkderra”, apo ndalimi i kafesë në punë./ CNA.al
