Ministri i Bujqësisë dhe Zhvillimit Rural, Bledi Çuçi deklaron se “ka pak kohë që ka përfunduar një tjetër investim i rëndësishëm që ndihmon sektorin bujqësor dhe agrobiznesin në Shqipëri”.
Ministri deklaron se “Armando Ndoka ka ngritur një sipërmarrje që i mungonte vendit tonë, por edhe rajonit. “Cool” është qendra Frigoriferike Logjistike e vetme në Shqipëri dhe në rajon që plotëson të gjitha standardet e Bashkimit Europian”.
“Me një kapacitet prej 10 mijë tonë ose 7 mijë paleta, kjo qendër ofron ruajtje të produkteve bujqësore dhe blegtorale, ruajtje të prodhimeve të detit, ruajtje të produkteve industriale, mjekësore e farmaceutike deri tek produktet kozmetike. “Cool” garanton gjurmueshmërinë e temperaturave që nga momenti i hyrjes së produkteve deri në momentin e daljes”, shprehet Çuçi.
Po ashtu ministri sqaron se “klientëve iu ofrohet mundësia e ndjekjes online dhe njoftimit me mesazh për çdo ndryshim temperature. Kjo qendër moderne me teknologji gjermane ka edhe një element tjetër të veçantë; operon me energji të rinovueshme”.
“Avantazh tjetër është pozicioni strategjik ku ndodhet, pranë aeroportit “Nënë Tereza”, në kryqëzimin e rrugëve drejt veriut dhe daljes për në portin e Durrësit. “Cool” është vërtet një investim cool”, shprehet ministri.
