Policia turke pas ndalimit të bashkëpunëtores më të afët të Ozer, ka arrestuar tezen e krijuesit të kriptomonedhës Thodex, teksa vijojnë hetimet për lokalizimin e këtij të fundit. Si pjesë e hetimit të kryer nga kryeprokurori turk, është ndaluar dhe kunata e Ozer, Güven Özer.
Në total u arrestuan 82 të dyshuar, të cilët mund të kenë informacion për vendodhjen e mashtruesit më të madh në historinë e Turqisë, si dhe dyshohen si të përfshirë në skemën e mashtrimit të krijuar nga Ozer. Ndërsa 37 të dyshuar u lanë të lirë pasi dhanë deklaratat e tyre përballë hetuesve., masat e kontrollit gjyqësor u aplikuan për 36 të dyshuarit.
Rana Azap, punonjësi i kompanisë përgjegjëse për financat, u arrestua pas dhënies së deklaratës së tij në organet ligjzbatuese turke. Kujtojmë se Ozer akuzohet për vjedhjen e rreth 2 miliardë dollarë nga 300 mijë klientë pjesë e kompanisë së tij të kriptomonedhave Thodex.
Sipas të dhënave të policisë, por edhe mediave Turke, Özer fluturoi për në Tiranë me një biletë që e bleu nga një kompani ajrore shqiptare. Ai u prit në Tiranë nga një çift shqiptarësh me të cilët kishte krijuar kontakte gjatë vizitës së tyre në Turqi. Fillimisht, ai dyshohet se qëndroi në zonën e pazarit të ri në banesën e çiftit shqiptar e më pas te Myslym Shyri pasi në media qarkulloi se ai ishte përfshirë në listën e të kërkuarve të Interpol.
Nga këtu dyshohet se Ozer ka qëndruar në një hotel në zonën e Zogut të Zi, ndërsa dy netët e tjera në një hotel pranë ish-21-dhjetorit. Policia shqiptare ka informacion se prenotimi i hotelit ishte bërë nga çifti shqiptar të cilët janë marrë në pyetje, por nuk kanë dijeni mbi vendndodhjen e të riut miliarder.
