Blerim Çipi djaloshi 20 vjeçar, studion për Histori dhe Gjeografi në universitetin e Vlorës, ndërkohë punon dhe si kamarier. Por pasioni i tij është teatri. Prej 5 vitesh është angazhuar në Teatrin Rinor “Petro Marko” të Qendrës Kulturore në Vlorë. E në fakt suksesi i Blerimit dhe shokëve të tij është i shpejtë e tani quhen “Parodistët e rinj të Vlorës”, titull i cili në fakt është shumë obligues.
Por, Blerimi ka edhe një brengë. Në moshën 13-vjeçare, pas vdekjes së të atit, Blerimi u detyrua të punonte dhe aksidentalisht humbi gishtat e dorës. Me dhimbje, tregon se për shkak të mungesës së doktorëve të specializuar, nuk i shpëtuan as gjysmën e dorës.
Blerimi ka nevoje për protezë, por kjo lloj proteze nuk mund të bëhet në Shqipëri. Shërbimi Kombëtar për Rininë dhe RTSH në sajë të projektit “Një histori suksesi” synojnë të promovojnë të rinj si Blerimi që talentin e tyre e rrezatojnë si dritë mes vështirësish, por kanë nevojë të mbështeten për të vijuar të qetë realizimin e ëndrrave.
