Presidenti Trump njoftoi të enjten se do të emërojë ambasadorin amerikan në Gjermani, Richard Grenell si të dërguarin e tij të posaçëm për bisedimet e paqes midis Kosovës dhe Serbisë.
“Richard A. Grenell është ambasador i Shteteve të Bashkuara në Gjermani që nga muaji maj i vitit të kaluar. Zoti Grenell, ekspert i politikës së jashtme, është themelues i firmës “Capitol Media Partners” në vitin 2010, që ofron konsulencë për çështje të jashtme”,- njofton “Zëri i Amerikës”.
Ambasadori Grenell, ka qënë zëdhënës i ambasadës së Shteteve të Bashkuara në OKB për shtatë vjet, 2001-2008, duke e mbajtur këtë post më gjatë se çdo ambasador tjetër, duke shërbyer për katër ambasadorë të ndryshëm. Ai mban gradën Master për Administratën Publike nga universiteti i Harvardit.
Lëvizja e Presidentit Donald Trump ka shkaktuar jo pak habi në Beograd dhe në Prishtinë. Më 30 gusht, Departamenti Amerikan i Shtetit emëroi Matthew Palmer si përfaqësuesin e tij të Posaçëm për Ballkanin Perëndimor. Palmer që mban edhe postin e Zëvendës Ndihmës Sekretarit për Çështjet Evropiane, ka qenë i përfshirë në përpjekjet për të nxitur ripërtëritjen e bisedimeve ndërmjet Kosovës e Serbisë, të ndërmjetësuara nga Bashkimi Evropian.
Emërimi i tij si i dërguar special lidhej konkretisht me marrëveshjen mes Kosovës dhe Serbisë, të njëjtin funksion do të mbajë dhe Ambasadori i SHBA në Gjermani.
Kryeministri në detyrë i Kosovës, Hashim Thaçi, në një mesazh në rrjetet sociale ka përshëndetur vendimin e Presidentit të SHBA. “Mirëpres emërimin nga Presidenti Trump të Ambasadorit aktual të Shteteve të Bashkuara të Amerikës në Gjermani z.Richard Grenell, si i Dërguar i Posaçëm për Dialogun Kosovë – Serbi. Do të punojmë dhe angazhohemi bashkarisht rreth dialogut pa kushte, për arritjen e njohjes reciproke në kufijtë ekzistues”,- shkruan Haradinaj.
Ndërkohë analisti për Ballkanin Tim Judah e cilëson këtë lëvizje si të çuditshme. Në një postim në twitter ai shkruan: “Kjo është e çuditshme. Së pari, SHBA emëron Matt Palmerin, që e njeh rajonin dhe udhëheqësit e tij, si të dërguarin për Ballkanin dhe tani dikë tjetër pa asnjë rekord apo njohuri në Ballkan, me aq sa dimë në bisedimet Serbi-Kosovë”.
