Një zjarr i përmasave të konsiderueshme ka përfshirë kodrat e Myselimit dhe Bardhajve në zonën e Shkodrës, duke rrezikuar edhe banesat pranë vatrave të zjarrit.
Era e fortë dhe terreni i thyer kanë favorizuar përhapjen e shpejtë të flakëve në sipërfaqet me bimësi. Për përballimin e situatës është ndërhyrë edhe nga ajri me një helikopter.
Në terren janë angazhuar:
- 6 mjete zjarrfikëse të Bashkisë Shkodër dhe efektivët përkatës;
- një bot uji i Ndërmarrjes së Shërbimeve Publike;
- strukturat e Emergjencave Civile;
- Shërbimi Pyjor;
- përfaqësues të njësive administrative Rrethina dhe Postribë;
- një mjet zjarrfikës i Repartit Ushtarak Vau i Dejës.
Falë ndërhyrjes së forcave në terren, deri tani janë mbrojtur 15 banesa, duke shmangur rrezikun për familjet që jetojnë në zonë.
Operacioni vijon në koordinim me Prefekturën e Qarkut Shkodër dhe Agjencinë Kombëtare të Mbrojtjes Civile (AKMC), ndërsa ekipet po punojnë për izolimin e plotë të vatrave dhe parandalimin e përhapjes së zjarrit drejt zonave të banuara.
