Kryeministri Edi Rama deklaroi dje se, nuk ka hapje kazinosh dhe licencë për kazinotë marrin vetëm hotelet me brand ndërkombëtar.
Në një konferencë të përbashkët për shtyp me ministrin e Rindërtimit, Arben Ahmetaj dhe ministren e Financave dhe Ekonomisë, Anila Denaj, Kryeministri Rama u shpreh se, ” është përhapur një fjalë edhe në media, se këtu janë rihapur kazinotë dhe është i hapur bixhozi. Kjo është komplet gënjeshtër, nuk ka asnjë rihapje të bixhozit në Shqipëri.”
“Nuk ka asnjë lëshim dore për të dhenë leje, licenca për kazinotë. Është hapur vetëm një procedurë specifike, e cila lidhet me përfundimin e afatit të licensës së të vetmes kazino që ka qenë prej shumë e shumë vitesh në mes të Tiranës, që ju e dini dhe duke pritur që cilido qoftë të ofertojë nëse ka ofertë për të bërë në një zonë të caktuar, të definuar”, – deklaroi Rama.
Kryeministri theksoi se, “nuk është ashtu siç është përkthyer që te rruga filan do të hapet kazino. Jo, jo! Janë vetëm kufijtë e një perimetri, sepse në ligjin ekzistues kemi të drejtën e kazinove, vetëm në struktura me 5 yje ose kazino të veçanta në zona strategjike për zhvillim dhe për turistët, gjë që nuk e kemi ushtruar masivisht dhe nuk do ta ushtrojmë masivisht.”
“Pra, është shumë e thjeshtë nuk ka hapje kazinosh. Hotelet me 5 yje po, është në ligj, është në ligjin specifik për incentivimin e hoteleve me 5 yje po 5 yje me brande, jo 5 yje që i vë unë emrin Ezilaolinda, ato janë 5 yje që i vë unë vetë, por nuk janë 5 yje brandi”.
“Licensë për kazino marrin vetëm brandet ndërkombëtare të kuotuara ndërkombëtarisht. Nuk ka kthim mbrapa në këtë pikë ndërkohë që jemi shumë të shqetësuar për fenomenin e përdorimit online siç ndodh në të gjitha vendet edhe në Kinë apo në Turqi në vende ku është e ndalur, por ka shumë probleme me këtë dhe jemi duke menduar se çfarë do të bëjmë me këtë, por nuk bëhet fjalë këtu për asnjë hapje, është komplet fake news”, – përfundoi Rama.
