Operacioni “Bregdeti Ynë”, ministri Çuçi: 60 objekte pa leje u shembën vetëm në shtator nga Vlora në Ksamil

Inspektoriati Kombëtar i Mbrojtjes së Territorit vijon operacionin “Bregdeti Ynë”. Ministri i Brendshëm Bledi Çuçi ka deklaruar se gjatë muajit shtator janë shembur 60 objekte pa leje, në Vlorë, Himarë dhe Sarandë. Çuçi paralajmëron se do të pastrohet e gjithë vija bregdetare nga zaptuesit, duke shtuar se IKMT do të vijojë të evidentojë objekte pa leje edhe në zonat e mbrojtura. “Inspektoriati Kombëtar i Mbrojtjes së Territorit vijon operacionin “#BregdetiYnë”. Vetëm gjatë muajit shtator kur ky operacion rinisi pas sezonit veror, janë shembur mbi 60 objekte të ndërtuara pa leje apo në shkelje flagrante të lejes në bashkitë Vlorë, Himarë e Sarandë. Kush ka menduar se ishte thjesht një aksion, me siguri do të jetë zhgënjyer po aq sa ata që i ngritën këto objekte në shkelje të ligjit dhe tani duhet të përballen me pasojat. Do të pastrojmë të gjithë territorin e vendit, vijën bregdetare po e po siç nisëm në qershor, nga zaptuesit që duhet ta mësojnë njëherë e mirë se ka perënduar koha kur gjeje shesh e bëjë përshesh nën hundën e shtetit. IKMT dhe Policia e Shtetit bashkë me institucionet e tjera po punojnë ndërkohë të evidentojnë objekte pa leje edhe në zonat e mbrojtura dhe akset rrugore kombëtare, të cilat do të shemben pa as më të voglin hezitim”, shkruan Çuçi.