Banorët e pallateve të cilat janë dëmtuar nga tërmeti nuk ndihen të sigurt edhe pas verifikimit të ekspertëve. Muri ndarës i apartamenteve për njërën hyrje është shpallur i rrezikshëm, ndërsa për tjetrën jo. Një nga hyrjet në pallatin 581 në zonën e quajtur Varri i Bamit është shpallur e pabanueshme dhe banorët e saj janë shpërngulur që pas tërmetit, por ende nuk është e qartë se çfarë do të bëhet me këtë pallat.
Sipas banorëve, problemet me këtë ndërtesë lidhen me ndërhyrjet në themele. “Unë e di që te shkalla këtu në themelet e bodrumit, se këtu kanë qenë dikur vendstrehime, mesa di unë ka ndërhyrje. Kam dëgjuar që kanë sharruar derën, kanë pastruar ujin, nuk di më gjatë.” Të rrezikuar ndihen familjet që jetojnë në pallatin ngjitur, të cilët shprehen se jetojnë me frikë në banesat e tyre.
“Muri i kësaj dhome që ka pësuar këto plasaritje është i përbashkët me pjesën e murit të kuzhinës së shkallës tjetër që është shpallur e pabanuar. Inxhinierët thanë se nuk ka problem, ndërkohë që shkalla tjetër paska problem.” Tërmeti i 26 nëntorit vuri në pah edhe rrezikun nga depozitat e vendosura mbi soleta, të cilat në këtë hyrje kanë sjellë edhe deformim të tavanit.
“Unë kam folur me banorët, i heqim sot, i heqim nesër. Dikush thotë unë do ta heq i fundit, dikush i parafundit, por të dalë dikush i pari nuk ka dalë akoma.” E braktisur nga të gjithë dhe nën ruajtjen e një oficeri të policisë hyrja 1 në pallatin 581 përbën rrezik edhe për këdo kalimtar.
