Kryeministri, Edi Rama nëpërmjet një postimi në facebook, ka bërë me dije se kanë nisur takimet me përfaqësues të sipërmarrjes private për të diskutuar mbi domosdoshmërinë e rrites së mëtejshme të pagave.

Ai shtoi se qeveria po bën gati korrektimin e të gjithë skemës së pagave, pas rritjes së pagës minimale, e cila nga muaji prill do jetë në shifrën 40 mijë lekë.

“Nisim takimet me sipërmarrjen për domosdoshmërinë e rritjes së mëtejshme të pagave në sektorin privat, ku tanimë nga prilli minimumi i detyrueshëm është 40 mijë lek. Ndërkohë që qeveria po bën gati korrektimin e krejt skemës së pagave pas rritjes së ndjeshme të pagës minimale, si reagim ndaj vështirësive të paparashikuara të krijuara kudo prej agresionit të Putinit dhe inflacionit të luftës”-shkruan Rama. 

Me vendim të qeverisë, nga 1 prilli i këtij viti do të rritet paga minimale në Shqipëri. Nga 34 mijë lekë në muaj, që është aktualisht, paga minimale do të arrijë në 40 mijë lekë me qëllim lehtësimin e pasojave të inflacionit. Qeveria ka bërë me dije se synimi me politikën e ndërmarrë është kapërcimi i nivelit të pagave minimale në rajonin e Ballkanit Perëndimor në raport me vendet e tjera.