Norma e papunësisë në Eurozonë ra në muajin Gusht në nivelin më të ulët në më shumë se një dekadë, duke vazhduar trendin rënës që ka zgjatur prej 5 vitesh.
Zyra e Statistikave e Bashkimit Europian, Eurostat, bëri të ditur se norma e papunësisë në 19 vendet që ndajnë euron, ra në 7.4% në Gusht, duke prekur nivelin më të ulët që prej Majit 2008, kur ekonomia nisi të ndiejë ndikimin e krizës botërore të nisur në Shtetet e Bashkuara.
Rënia nga muaji Korrik zgjati trendin pozitiv të nisur në Gusht 2014, kur papunësia qëndronte në 11.5%. Që prej atëherë, treguesi ka rënë apo ka mbetur i pandryshuar çdo muaj.
Rënia e Gushtit ishte surprizë, ndërkohë që ekonomistët prisnin një normë të pandryshuar nga Korriku. Papunësia në Gusht ra në vendet që kanë normën më të lartë, çka tregon se ndasitë ekonomike mes bllokut po tkurren, pavarësisht se janë ende të mëdha.
Në Spanjë, norma e papunësisë ra në 13.8% në Gusht, ndërsa në Itali, treguesi preku 9.5%. Greqia, që është vendi me normën më të lartë të papunësisë, regjistroi një rënie në 17%.
Në Gjermani dhe Francë, që janë 2 ekonomitë më të mëdha të Europës, norma mbeti e pandryshuar në 3.1% dhe 8.5% në mënyrë respektive.
