Presidenti Ilir Meta ka reaguar për ndërtimin e HEC-eve duke bërë thirrje publike që të mos lejohet që vendimmarrjet politike të veprojnë në kundërshtim me interesin publik. Në një status në Facebook, Meta thekson se parakusht i të gjitha kushteve janë zgjedhjet e lira dhe të drejta, si dhe dëgjimi i zërit të qytetarëve.
“Të MOS LEJOJMË, me mjete demokratike, që vendimmarrjet politike të veprojnë në KUNDËRSHTIM me interesin publik, si në rastin e HEC-ve mbi Vjosë. PARAKUSHT i të gjitha kushteve, janë ZGJEDHJET e lira dhe të drejta dhe dëgjimi i ZËRIT të qytetarëve”, shkroi Meta.
Presidenti Ilir Meta ishte sot pjesë e Forumit Ndërkombëtar për lumin “Vjosa”, ku bëri me dije se u fitua një betejë e parë nga ambjentalistë e aktivistë, që ka të bëjë me mosdhënien e lejes për HEC-in e Kalivaçit.
Ai tha se Vjosës i duhet një modeli i zhvillimit të qëndrueshëm ekonomik, ndërsa propozoi kthimin e saj në Park Kombëtar. “U bë e mundur të fitohet beteja e parë e një lufte, mosdhënia e lejes për HEC-in e Kalivacit. Do këshilloja që kjo nismë të vazhdohet për pjesën ende të pambrojtur të lumit Vjosa. Të shpalljet Park Kombëtar zona e Vjosës, sidomos pjesa Qesarat-Poçem e kërcënuar për ndërtimin e digave.
Vjosa nuk është vetëm e Shqipërisë, por e gjithë Europës. Duhet një strategji për zhvillim të qëndrueshëm,për mirëqenie për gjithë rajonin, jo ndërtim hercësh, të cilët nuk janë rrugë e blertë për zhvillimin e vendeve. Duhet turizëm veror, agrotuzimëm pasi është krejt e paparanueshme që zona të bukura dhe të pasura të shkatërrohen e braktisen. Janë vendimarrjet e gabuara politike që çojnë drejt shkatërrimit parajsa të tilla natyrore. Ne, me mjetet dhe veprime demokratike kemi për detyrë të mos e lejojmë”,tha Meta.
