Kreu i fasonerisë Gjergj Gjika në studion e emisionit “Ekopoltikë” ka bërë një paralajmërim, se deri në korrik do të dalin të papunë edhe 100 mijë persona të tjerë. Gjika iu referua situatës së krijuar nga koronavirusi dhe tha se rënia ekonomike do të jetë e lartë.
Gjergj Gjika: Javën e parë kur filloi ai burgi i madh i 2 mln e gjysmë shqiptarëve kam thënë diçka, rënia do jetë me 2 shifra dhe shifra e parë nuk do jetë njësh, por më e madhe se njësh. Ajo 9% është kot, sepse do jetë mbi 20% me minus. Kjo do të thotë që edhe 100 mijë persona të tjerë pa punë deri në korrik. Kanë ikur nga puna mesatarisht 10 mijë veta në ditë, kanë lënë punën njëherë e përgjithmonë.
Gjika tregon edhe kërkesën që i kishin bërë kryeministrit, por që ky i fundit nuk i ndihmoi.
Gjergj Gjika: Unë po ju them dicka për ta kuptuar atë dy standardet. Kur ishte puna për të bërë një të mirë, ne dërguam 30 mjekë në Itali dhe bëmë shumë mirë. Në të njëjtën periudhë i kemi kërkuar me shkresë zyrtare që të ndërhyjë pranë qeverisë italiane dhe industrinë e fasonit ta furnizonte me veshjet e tenderave publik italianë sic ishin për mjekësinë italiane, policinë dhe ushtrinë. Mundet që të ketë bërë ndonjë letër, por nuk bëri me të njëjtin temp dhe me të njëjtin pathos. A e dini ju që këto porosi që mund ti bënte fasoni shqiptar që ndër vite ka prodhuar për tregun italian, tani ata i marrin dhe i importojnë nga Kina, në vend që ti importonin që këtej.
