Banorët e Astirit, të cilët e kanë zgjatur protestën e tyre për shkak të prezencës së lartë të policisë kanë bërë thirrje reagim nga ana e ambasadorëve dhe përfaqësuesve të opozitës.
Burime bëjnë me dije se kryetari i Partisë Demokratike Lulzim Basha është nisur për tek Unaza e Re, ku po zhvillohet edhe protesta dhe ku njoftohet se ka prani të shtuar të forcave policore, përfshirë edhe Forca të Ndërhyrjes së Shpejtë.
Kujtojmë se banorët ju kanë bërë thirrje edhe ambasadorëve të huaj të akredituar që të dalin përkrah tyre pasi ndihen të kërcënuar.
Ata si çdo mbrëmje kanë bllokuar rrugën por gjatë protestës së sotme, ata janë rrethuar nga një numër i madh policësh të cilët nuk i kanë lejuar të bllokojnë të dy akset e Unazës.
Ish-deputeti i Partisë Demokratike, Klevis Balliu ka postuar në rrjetet sociale përkrah të cilës shkruan se Policia përgatitet për dhunë kundër banorëve të Unazës së Re.
Në mbështetje të banorëve gjenden edhe disa ish-deputetë dhe përfaqësues të Partisë Demokratike dhe Lëvizjes Socialiste për Integrim.
