Njoftimi mbi rritjen 15% të pagës së mësuesve përveçse veprim i qartë propagandistik, në traditën e rilindjes, shënon një nga tiparet më të natyrshme të kësaj të fundit: korruptimin moral si shitblerje e dinjitetit! Veprimi në vetvete, sidoqoftë i përligjur, mbetet një akt paturpësie: 3 muaj përpara zgjedhjeve ai nuk është tjetër veç një tentativë e rradhës për blerje, hile, përbuzje e poshtërim për mësuesit.
Në 8 vjet – nuk pati asnjë rritje page për mësuesit, të paktën në masën 2%, për indeksimin e inflacionit. Nuk u krye asnjë shpërblim në fund të vitit, për 8 vjet, asnjë pagë shtesë, asnjë bonus financiar. Tri muaj para zgjedhjeve baba dovleti e bën zemrën hambar efhe për mësuesit! Pra, për të shkuar në 25 prill, vlera e votës së një mësuesi është 15-16 mijë lekë gjithsej, tri muaj lëmoshë, të kthyera nga mbi 5 milionë lekë, që rilindja u detyrohet mësuesve, për indeksimin e pagave, pagën e 13, apo ndërhyrjet mbështetëse financiare gjatë pandemisë.
Film i vjetër ky, me aktorë të dobët, i “dorës së ngrohtë” të partisë, që ka zëvendësuar Zotin në qiell, mbi shpatullat e atyre që u duhet të lëvdojnë Partinë, e jo punën që bëjnë për pagën që marrin. Ku vendim hipokrit, vërteton mënyrën se si i qeveris rilindja qytetarët shqiptarë përmes shantazhit, është shenjë e sundimit, ndryshe e kërcënimit – “ju kemi në grusht, e ardhmja juaj, e fëmijëve tuaj, dinjiteti juaj profesional e njerëzor, është në dorën tonë”. Kjo nuk është rritje rrogash – kjo është skërrmitje dhëmbësh në prag të zgjedhjeve!
Mësuesit janë qytetarë të Republikës së Shqipërisë, jo shegertë të rilindjes! Te bindur se flasim në emër të një shumice, pa dallim ideologjik, se po u japim zë edhe qytetarëve me bindje të majtë, të fyer e të nëpërkëmbur nga rilindja, është e qartë se 25 prilli po bëhet përditë, një sprovë lirie, një mundësi dinjiteti që nuk duhet humbur!
