Kreu i Sindikatës së Naftëtarëve Sokol Dautaj pas përfundimit të takimit me kryeministrin Edi Rama ka deklaruar se kanë arritur dakordësinë që të marrin 400 mijë lekë të vjetra për një periudhë 12 mujore si dhe sigurimet shoqëroe. Dautaj tha se nga kjo pagë do të përfitojnë 870 naftëtarë, duke shtuar se do të përfitojnë të gjithë naftëtarët të cilët kanë qenë në listën e borderosë nga dhjetori i vitit 2019.
“Kemi arritur dakordësinë që të jepet një pagë prej 400 mijë lekësh prej një periudhë 12 mujore si dhe sigurimeve të pagave që do të marrim. Me zgjidhjen e dytë jemi të kënaqur, por me detyrimet e prapambetur që kemi në kohë, duhet të ndiqet rruga ligjore. Në kërkuam një kompromis që duke parë hallet tona pagat të merren dy dhe nga dy. U hodh ideja që po punohet me kompaninë, ne jemi skeptik deri në ardhjen e kompanisë.
Numri i naftëtarëve që përfitojnë është 870 naftëtarë. Të gjithë naftëtarët që kanë qenë në listën borderosë nga dhjetori të vitit 2019 do të përfitojnë të gjithë.”- tha Dautaj.
Ky takim është i dyti brenda një jave, ku në takimin e parë naftëtarët pranuan të marrin vetëm një pagë nga ana e qeverisë dhe të vijojnë betejën ligjore me kompaninë për pagat e prapambetura.
Ditën e sotme Komisioni i Ekonomisë ka akorduar 560 milionë lekë për naftëtarët. Kujtojmë se pjesë e përfaqësisë që u ritakua me kryeministrin, janë disa prej grave greviste, punonjës të Rafinerisë, si dhe kreu i sindikatës së naftëtarëve, Sokol Dautaj. Prej kohësh përmes disa protestave dhe grevës së urisë naftëtarët kërkojnë zgjidhje për marrjen e pagave të prapambetura, si dhe rikthimin e tyre në punë me kontrata individuale.
