Specialistët për Hetimin e Krimit në Komisariatin e Policisë Nr. 5 kanë bërë të mundur arrestimin e një 27-vjeçari pasi ka përndjekur dhe ka dhunuar një 34-vjeçare. Ngjarja ka ndodhur në rrugën “Demokracia” në Tiranë, ndërsa përndjekja ndaj të resë ka vijuar prej 6 muajsh. 27-vjeçari me iniciale A.T, ka goditur me grushta në kokë 34-vjeçaren duke i shkaktuar lëndime ndërsa autori pas kësaj ngjarje është shpallur në kërkim.
“Specialistët për Hetimin e Krimit në Komisariatin e Policisë Nr. 5 bënë arrestimin në flagrancë të shtetasit të shpallur në kërkim A. T., 27 vjeç, pasi në rrugën “Demokracia“, ka goditur me grushte në kokë shtetasen L. B., 34 vjeç, të cilën kishte 6 muaj që e përndiqte duke i krijuar ankth dhe frikë”, thuhet në njoftimin e policisë. Gjithashtu nga specialistet e qarkullimit rrugor është bërë i mundur edhe ndalimi i 3 personave, të cilët kanë shkelur rregullat e qarkullimit, të tilla si “drejtimi i mjetit pa leje drejtimi, dhe në gjendje të dehur”.
