Tre persona janë arrestuar në Angli nën akuzën e mashtrimit me qëllim përvetësimin e fondeve të qeverisë britanike, të alokuara për të ndihmuar bizneset e goditura nga Covid-19. Oficerët në britani arrestuan tre meshkuj të moshave 43, 48 dhe 37 këtë të martë, në banesat e tyre në Londër, me dyshimin e përvetësimit të të ardhurave publike në sajë të mashtrimit me përfaqësim të rremë. Kjo treshe nëpërmjet një skeme mashtruese arriti të siguronte 145,000 £ hua të dhënë nga qeveria, si ndihmë për vështirësitë e biznesit gjatë pandemisë.
Të tre të dyshuarit u morën në pyetje dhe më pas janë liruar ku do të hetohen në gjendje të lirë. “Shumica dërrmuese e bizneseve do të kenë përdorur ‘Eat Out’ me përgjegjësi, por ne nuk do të hezitojmë të veprojmë aty ku dyshojmë se ka abuzim me skemën”, tha Kath Doyle, zëvendës drejtor i shërbimit të hetimit të mashtrimit të HMRC.
“Këto janë paratë e taksapaguesve dhe çdo pretendim që provohet të jetë mashtrues kufizon aftësinë tonë për të mbështetur njerëzit dhe privon shërbimet publike nga fondet thelbësore.” Më shumë se 100 milion ushqime me çmim të reduktuar u konsumuan në të gjithë Mbretërinë e Bashkuar nën këtë skemë qeveritare, e cila ofroi një zbritje prej 50 përqind të çmimit deri në muajin gusht me qëllim mbështetjen e sektorit të mikpritjes. Arrestimet vijnë pasi një raport i fundit zbuloi se një nga mashtrimet më të mëdha të pretenduara në skemën Eat Out to Help Out ishte në zinxhirin e picave të Papa John.
