Një tragjedi është shmangur në Gjermani. Mësohet se një 43-vjeçar ka pësuar një sulm në zemër teksa po drejtonte makinën e tij.
Sipas mediave ndërkombëtare, me të në makinë ka qenë edhe djali i tij 11-vjeçar, i cili parandaloi tragjedinë.
Policia gjermane në njoftimin zyrtar ka bërë me dije se pasi pësoi sulmin në zemër, shoferi humbi kontrollin dhe doli në korsinë tjetër, duke u përplasur me një makinë tjetër. Ndërkohë, djali i tij, një pasagjer, ka arritur të kapë timonin dhe të ndal mjetin në shiritin ndihmës.
Ai më pas i ka telefonuar ndihmës së shpejtë që babanë e tij e dërgoi në spital, kurse policia ka vlerësuar se dëmet materiale shkojnë në rreth 4.000 euro. Ndërkohë, të gjithë po flasin për veprimin e të miturit.
