Pjesa shqiptare e Ohrit tashmë pjesë e trashëgimisë botërore të UNESCO-s është një zonë e cila të ofron përveç bukurive natyrore dhe potenciale të shumta turistike për vizitorët vendas dhe të huaj.
Pogradeci është qyteti ku qetësia e liqenit bashkohet me qetësinë e njerëzve dhe ku vizitorët ndjejnë kënaqësinë e shërbimit dhe mikpritjes.
Ky qytet i ofron çdo grupmoshe qetësi dhe argëtim, ku liqeni është një parajsë qetësie dhe ku ushqimi bio i gatuar me gjithë delikatesën mesdhetare nga zonjat duararta pogradecare me perimet e sapo mbledhura nga fusha dhe koranin që nga rrjeta e peshkatarit shkon direkte në tigan e bën eksperiencën në këtë qytet magjike dhe të paharrueshme.
Pogradeci ofron çdo gjë për çdo vizitorë për fëmijët peshkimin e peshqëve në breg të liqenit një gjë kjo që duket si loja e preferuar e tyre. Për vizitorët që pëlqejnë itineraret kulturore mozaikun e Linit, dhe për ata që pëlqejnë turizmin natyror në anën tjetër është Driloni.
Një orë larg është dhe Parku Kombëtar i Prespës, ku vizitorët i pret ishulli i Maligradit dhe pelikanët kaçurrel i urojnë atyre mirëseardhjen me spektaklin e tyre ujor si dhe tava e krapit një ushqim tradicional i cili të tundon për tu kthyer përsëri në këtë vend.
Vizitorët që shkojnë Pogradecin s’duhet të harrojnë dhe pasaportat pasi në mbyllje të rrugëtimit të tyre mund të shijojnë një kafe në Shën Naum, Ohër apo Strugë.
