Policia e Shtetit ka arrestuar njërin nga autorët e plagosjes me armë zjarri së 24-vjeçarit D.V mbrëmjen e djeshme në Yzberisht. I arrestuari është Iljaz Avdillari 24 vjeç, ndërsa i shpalluri në kërkim është Fatmir Avdillari i njohur si ‘Xubi’ për të cilin policia po punon për lokalizimin dhe kapjen e tij.
Sipas policisë ngjarja ka ndodhur ditën e djeshme rreth orës 22.45 në rrugën e Qelqit, ku i arrestuari dhe i shpalluri në kërkim kanë qëlluar me armë zjarri dhe për pasojë është plagosur në dorë 24-vjeçari D. V., jashtë rrezikut për jetën. Nga kontrolli i ushtruar në banesën e të shpallurit në kërkim policia gjeti edhe dy thika.
Si i arrestuari edhe kushëriri i tij i shpalluri në kërkim rezultojnë të jenë me precedentë të mëparshëm penale.
Iljaz Avdillari është arrestuar në vitin 2012 pasi së bashku me dy persona të tjerë kanë lidhur e kanë dhunuar rojen e sigurisë së një kompanie materialesh ndërtimi, më pas kanë vjedhur një sasi të konsiderueshme hekuri. Ndërsa ‘Xubi’ akuzohet për dy vrasje.
