Policia e Vlorës ka dhënë njoftimin zyrtar në lidhje me plagosjen e ndodhur pak orë më parë në qytet.
Një 33 vjeçar mbeti i lënduar nga goditjet me thikë dhe u dërgua në spital, ku është nën kujdesin e mjekëve jashtë rrezikut për jetën.
Si pasojë e një konflikti për motive të dobëta, 2 vëllezër L.M., dhe G.M., goditën me grushte dhe me thikë 33-vjeçarin.
Forcat e rendit më pas kapën 2 autorët e dyshuar dhe i shoqëruan në komisariat.
Njoftimi i Policisë:Vlorë, Goditën me grushte dhe me mjet prerës (thikë), një 33-vjeçar, gjatë një konflikti të çastit për motive të dobëta, falë reagimit të menjëhershëm të shërbimeve të Policisë, kapen dhe shoqërohen në Komisariat, 2 autorët e dyshuar.
Shërbimet e Forcës së Posaçme “Shqiponja”, pas njoftimit për një konflikt mes disa shtetasve, në lagjen “Partizani”, kanë ndërhyrë menjëherë për parandalimin e përshkallëzimit të konfliktit.
Si rezultat i veprimeve të shpejta, janë kapur dhe shoqëruar në Komisariat, 2 autorët e dyshuar shtetasit L. M., 25 vjeç dhe G. M., 25 vjeç (vëllezër), të cilët gjatë konfliktit për motive të dobëta, dyshohet se kanë goditur me grushte dhe me mjet prerës (thikë), shtetasin O. R., 33 vjeç, banues në Vlorë.
Shtetasi O. R. ndodhet në spital, jashtë rrezikut për jetën.
Në drejtimin e Prokurorisë, vijon puna hetimore për sqarimin e rrethanave të ngjarjes.
