Forca më e madhe e opozitës në Poloni zgjodhi nënkryetaren e Dhomës së Ulët të parlamentit, Malgorzata Kidawa-Blonska, si kandidate për zgjedhjet presidenciale që do të mbahen në pranverë.
“Ne do të fitojmë dhe polakët nuk do të kenë më turp nga presidenti i tyre”, deklaroi sot Kidawa-Blonska pasi partia centriste ”Platforma qytetare” (PO), zgjodhi atë për të marrë pjesë në kongresin kombëtar të partisë në Varshavë. Delegatët e partisë zgjodhën Kidawa-Blonska-n në vend të rivalit të saj Jacek Jaskowiak, kryebashkiak i qytetit perëndimor të Poznanit.
Opozita shpreson se një fitore presidenciale mund të ndihmojë në mbajtjen nën kontroll të qeverisë konservatore. Presidenti ka të drejtën e vetos ndaj legjislacionit që vjen nga parlamenti dhe partia “Ligj dhe Drejtësi” nuk ka mbështetjen e votave në Dhomën e Ulët për të rrëzuar një veto presidenciale.
