Ministri i Turizmit dhe Mjedisit, Blendi Klosi, është pyetur mbrëmjen e sotme në lidhje me arsyet se pse nuk lejohet ende hapja e plazheve publike. Në një intervistë për emisionin “Open” në Top Channel, Klosi tha se nuk virusi nuk është larguar dhe në plazhe krijohen grumbullime qytetarësh.
Ai tha:
Këtë pyetje keni dy muaj që ma bëni. Në fillim më keni pyetur pse nuk lejohet të dalin njerëzit të dalin nga liqeni. Tani ne nuk lejojmë plazhet se aty do ketë një grumbullim të njerëzve duke rrezikuar përhapjen e virusit. Nuk është e thënë se doli dielli dhe virusi u largua. Jo, virusi është aty, nuk ka ikur.
Mirëpo, çfarë problemi do të kishte hapja e plazheve publike nëse ruhet distanca sociale, pasi ekspertët e shëndetësisë në Shqipëri dhe në botë kanë thënë se koronavirusi nuk përhapet në ujin e detit dhe as nga rëra? Rama deklaroi më herët se nga 1 qershori do të nisë hapja e plazheve për hotelet, po atje a nuk do krijohen grumbullime qytetarësh e pushuesish, apo e gjithë kjo bëhet për të favorizuar pronarët e këtyre bizneseve? Përgjigjet e këtyre pyetjeve duhet t’i sqarojë ministri Klosi për publikun, ose vetë kryeministri Rama.
