Banorët shtëpitë e cilëve u dogjën të shtunën në Pogradec janë rikthyer pranë shtëpive të shkrumbuara për të shpëtuar të paktën kujtimet. Por flakët nuk kishin lënë asgjë. Kritika kishin me reagimin e zjarrfikësve, ndërsa presin kompensimin e premtuar me gjysmën e dëmit. Mes hirit dhe trarëve që ende lëshojnë tym, kërkojnë çfarë mund të ketë shpëtuar. Por shtëpive që u dogjën të shtunën në Pogradec u kanë mbetur vetëm katër muret.
Fatmirësisht nuk pati të lënduar, por 6 familje thonë se humbën gjithçka kishin. Ndaj zemërim tashmë kanë edhe ndaj zjarrfikësve. “Nuk do kishte dëme nëse zjarrfikëset do kishin organizim” Përballë akuzave shefi i zjarrfikësve thotë se ata bënë çfarë mundën me tre mjetet që kanë në dispozicion, ku njëri është i përshtatur dhe pësoi defekt. “Ajo nuk është një zjarrfikëse e mirëfillte, por një autobot qumështi i dhuruar nga rezervat e shtetit dhe ne e kemi përshtatur duke i vendosur një pompë, që është e viteve 60. Gjatë punës pësoi defekt”
1 çift të moshuarish është akomoduar në hotel, ndërsa familjet e tjera janë vendosur pranë të afërmeve, duke refuzuar strehën e bashkisë. Tashmë presin verifikimin e dëmeve dhe kompensimin e premtuar, edhe pse 2 katet që u dogjën nuk ishin të legalizuar. Sipas policisë shkak për zjarrin u bënë shkëndijat e zjarrit të dala nga një prej oxhaqeve që më pas u përhapën duke djegur 6 apartamente dhe papafingot.
