Një grua 31 vjeçare e dyshuar si e prekur nga koronavirusi është arratisur nga izolimi në spital, çka ka vënë menjëherë autoritetet në alarm. Mësohet se 31 vjeçarja ishte izoluar në spital, pasi mjekët kishin dyshime të forta se ajo është e prekur nga virusi misterioz kinez.
Mediat vendase raportojnë se ngjarja ka ndodhur në spitalin e Salzburgut në Austri. Ajo ishte shfaqur vullnetarisht në spital në fillim dhe pasi kishin kryer testet e kishin izoluar. Por, ajo ka “avulluar” gjatë natës, duke shmangur jo vetëm personelin mjekësor por edhe forcat ligjzbatuese.
Një aksion i madh kërkimi ka nisur ndaj saj. Mësohet se pacientja më herët kishte udhëtuar në Tajvan dhe Zelandën e Re.
Ajo kishte pasur probleme të shumta me frymëmarrjen. Shtrati i pacientes u gjet bosh rreth orës 3 të mëngjesit të kohës lokale, kur një infermiere shkoi ta kontrollonte. Ende është e paqartë sesi arriti të arratisej nga izolimi.
