Ligji për mbylljen e lojërave të fatit prej 3 ditësh ka hyrë në fuqi, por si duket ende nuk është “përqafuar” nga bizneset e lotove.
Ish-kryeministri Sali Berisha, prej dy ditësh ka publikuar me fakte sesi disa pika lotosh sportive vijojnë të jenë të hapur edhe pas hyrjes së ligjit në fuqi.
Por kjo është konfirmuar edhe nga vetë policia, e cila gjatë kontrollit ka konstatuar në dy pika të lojrave të fatit që ushtronin veprimtarinë edhe pas hyrjes në fuqi të ligjit që i ndalon ato.
Për këtë policia ka proceduar penalisht pronarët e dy pikave të basteve sportive, T.C. 22-vjeç dhe E.B.
Në njoftimin e policisë thuhet:
Tiranë
Policia e Tiranës vijon kontrollet në të gjithë qarkun në bazë të planit të masave për evidentimin e ushtrimit dhe zhvillimit të kundraligjshëm të lojërave të fatit.
Konstatohen 2 subjekte, që nuk kishin mbyllur aktivitetin dhe iu gjetën aparatura të dyshuara për lojëra fati.
Policia lokale procedoi penalisht pronarët e tyre, konkretisht:
– T.C., 22 vjeç, banues në Tiranë, për veprat penale “Organizimi i llotarive të palejuara” dhe “Vënia në dispozicion e lokaleve për lojëra të palejuara”, pasi në rrugën “Bardhok Biba” në lokalin e tij nuk ishte mbyllur aktiviteti i lojërave të fatit.
– E.B., për veprën penale “Organizim i palejuar i lojërave të fatit”, pasi në rrugën “Muhamet Allushi” në subjektin e tij u konstatuan aparatura të dyshuara për lojëra fati.
Kontrollet kundër aktivitetit të lojërave të fatit do të vijojnë në gjithë qarkun Tiranë deri në ndëshkimin me ashpërsi të subjektit të fundit që ushtron këtë aktivitet anti-ligjor. Policia e Shtetit fton këdo të denoncojë falas në numrin 112 ose përmes aplikacionit “Komisariati Dixhital” çdo veprimtari të tillë të kundraligjshme.
