Ministria e Kulturës ka prezantuar ditën e sotme Planin e Menaxhimit të Integruar të Parkut Kombëtar të Butrintit. Kjo ministri ka organizuar edhe një tryezë konsultimi të hapur me publikun për Parkun Kombëtar të Butrintit, ku është diskutuar me specialistë të fushës, arkeologë dhe studiues të trashëgimisë kulturore në lidhje me këtë plan kombëtar që synon të hapë një kapitull të ri në lidhje me menaxhimin e këtij aseti të trashëgimisë kulturore dhe ekonomisë kombëtare.
“Plani i Menaxhimit të Integruar i Parkut Kombëtar të Butrintit na uli sot në një tryezë diskutimi me specialistë, arkeologë, studiues, drejtues institucionesh. Ligji i ri për Trashëgiminë Kulturore na vendos përpara sfidave të reja, që synojnë ta kthejnë trashëgiminë tonë në motor zhvillimi ekonomik. Sot jemi të gjithë këtu pikërisht për këtë qëllim, që Butrinti me të vërtetë të jetë një markë, të ruajmë dhe të promovojmë trashëgiminë tonë kulturore dhe ta kthejmë atë në një motor zhvillimi të qëndrueshëm,” shprehet ministrja e Kulturës Elva Margariti.
Plani i i ri i menaxhimit të parkut të Butrintit adreson çështje të cilat janë të mbartura nga e shkuara dhe nga ana tjetër jep zgjidhje mbi kontekstin e ri të krijuar me ligjin e trashëgimisë. Plani i ri i menaxhimit ofron udhëzime dhe politika bazuar në praktikat më të mira për menaxhimin e integruar të vlerave kulturore dhe natyrore./ATA
