Tetë dosje të kontratave koncesionare të hidrocentraleve nga 54 të tilla, kanë probleme të mëdha.
Raporti u prezantua sot nga Zv.ministri i Infrastrukturës dhe Energjitikës, Hantin Bonati.
Ky i fundit u shpreh së për kontratat me probleme, do të fillojnë menjëherë procedurat për ndërprerjen e tyre në mënyrë të njëanshme.
Sipas tij, problemet në këto kontrata lidhen me moskorrektësinë nga ana e subjekteve, si dhe burokracitë e ndjekura nga institucionet publike.
Ai tha:
Aktualisht kanë kaluar procesin e skanimit 54 dosje, 8 prej të cilave kanë rezultuar me probleme të mëdha dhe shkelje të kushteve kontraktuale, për të cilat do të fillohet procedura për ndërprerjen në mënyrë të njëanshme të kontratës. Ndër problematikat kryesore të konstatuara nga kontrolli i deritanishëm mund të përmendim: mosrespektim e afateve kohore procedurale; mosrespektimin e kushteve dhe kritereve në kontratat dhe lejet e lëshuara (qofshin të aspektit ndërtimor, mjedisor, financiar etj) Në vëmendje të analizës sonë janë jo vetëm problematikat që janë rezultat i jokorrektësisë nga ana e subjekteve, por janë dhe problematikat që janë shkaktuar nga burokracia procedurale e ndjekur nga institucionet publike. Ndërprerja e kontratave është një proces kompleks dhe nga ana e Ministrisë po procedohet në mënyrë të kujdesshme që të mos ketë risqe dhe pasoja financiare për buxhetin e shtetit.
