Ministrja e Arsimit, Sportit dhe Rinisë, Evis Kushi, vizitoi shkollën 9-vjeçare “Jani Minga” në Vlorë dhe gjimnazin “Ali Demi”, ku pa nga afër zbatimin e masave antiCOVID dhe aspekte të tjera që janë në funksion të mbarëvajtjes së mësimit. Gjatë vizitës në shkollën “Jani Minga”, ministrja tha se “nxënësit e kësaj shkolle janë kampionë të vërtetë plotësisht të kujdesshëm, mbajnë maskën, ruajnë distancën dhe zbatojnë çdo rregull tjetër për të ruajtur bashkëmoshatarët, mësuesit dhe prindërit e tyre”.
“E njëjta situatë shumë e mirë reflektohet edhe në gjimnazin “Ali Demi”, ku bashkë me kryetarin e Bashkisë Vlorë Dritan Leli dhe kolegen deputete Vilma Bello e njëkohësisht ish-nxënëse e kësaj shkolle, u interesuam mbi ecurinë e procesit mësimor dhe pamë nga afër masat e ndërmarra antiCOVID”, – tha Kushi.
Ministrja Kushi u shpreh se “jam e kënaqur mbi ecurinë e deritanishme të mësimit, respektimin e masave dhe ndërgjegjësimin nëpër shkolla, sikurse jam shumë besimplotë që me këtë ritëm optimal, këtë vit shkollor jo të lehtë do ta kalojmë bashkërisht me sukses”.
