Promovohet libri “KUDHËS PERIVOLI,- BREZAT QË BËNË HISTORINË”
Më 19 gusht 2022, në Hotel Chimaera, në #Himarë u prezantua libri “Kudhës Perivoli, – brezat që bënë historine”, të bashkëautorëve Thoma Leka & Aleksandra Cani.
Morën pjesë banorë të Kudhës Perivolit, të fshatrave përreth, intelektualë, pushues të shumtë dhe të ftuar nga Bashkia Himarë.
Përshëndetën Z.Gjergji Goro, Kryetar i Bashkisë Himarë, Znj.Vilma Bello, Zvëndësministre e Turizmit, Znj.Irena Toci, nga Shtëpia Botuese Toena dhe Z.Fate Velaj, studiues.
Libri është një studim i thelluar, monografi, ku pasqyrohet historia e Kudhës Perivolit në shekuj, arkeologjia, omonimia, toponimia emërore, fiset, 16 kishat, kurbeti shekullor, një fshat arsimdashës, bujqit e blegtorët dhe organizimi administrativ.
Pjesë interesante është trashëgimia kulturore me ndërtimet e tipit mesjetar, legjendat, baladat, bejtet, kënget, vjershat, lojerat, veshjet dhe kulturën e jetesës.
Zënë vend të vecantë ritet, profesionet e kudhësioteve, trajtimi politik dhe ekonomik pas viteve ’90. ” Sot dhe më tej…”, shpalos hapësirat ekoturistike të Kudhës Perivolit dhe Luginës së tij per zhvilliminin e një turizmi atraktiv.
Njerëz të vecantë të Kudhës Perivolit, shprehje, urime, mallkime, gjëegjëza, e folura e Kudhësit dhe një “Fjalorth” dhe kudhësiotë të përfaqësuar për thënie, përbëjnë një mundësi prezantimi të bukur të pasurive materiale e shpirtërore të njerëzve të Kudhës Perivolit.
Libri ka 496 faqe, ka foto të rralla, një stil gjuhësor e letrar të vecantë dhe është botim cilësor i Shtëpisë Botuese TOENA.
