Kryeministri Edi Rama ka reaguar lidhur me protestën e mbajtur një natë më parë nga Partia Demokratike, ku u plagosën 21 persona, 19 prej të cilëve efektivë policie.
Përmes një postimi në rrjetin social “X”, të cilin e shoqëron me një foto të bombave molotov të përdorura nga protestuesit e opozitës, Rama i bën thirrje drejtësisë të ndëshkojë personat që përdorën ato që ai i quan armë me kapacitet vdekjeprurës. Kreu i qeverisë shprehet më tej se disfata në zgjedhjet e ardhshme do të jetë edhe më e madhe për PD.
“Këto janë bombat artizanale me të cilat janë sulmuar, djegur e plagosur mbrëmë punonjësit e policisë, nga e vetmja parti politike në botën demokratike që ushtron dhunë dhe e dyta në historinë e botës së tërë – pas asaj të famëkeqit Robert Mugabe të Zimbabvesë – që i shkon mbrapa një tetëdhjetë e kusur vjeçari të damkosur e të lajthitur! Uroj që drejtësia të bëjë drejtësi për policët e plagosur dhe të ndëshkojë pa ngurrim bartësit e këtyre armëve me kapacitet vdekjeprurës! Sa për fatin politik të këtij cikli të ri jashtënxjerrjesh në bulevard, ai do të shkruhet si zakonisht në zgjedhjet e vitit të ardhshëm me një disfatë ende më shembullore se sa të mëparshmet, ndërkohë që ne do të vazhdojmë pa u ndalur rrugën drejt Shqipërisë 2030 në Bashkimin Europian”, shprehet Rama.
