Presidenti i Sri Lankës, Gotabaya Rajapaksa ia ka mbathur nga vendi, pas protestave të fuqishme të popullit, si pasojë e krizës së thellë ekonomike.
Presidenti ishte fshehur prej ditësh, ndërkohë që turmat u futën në pallatin presidencial të shtunën.
Vëllai i presidentit, ish ministër i Financave, gjithashtu është larguar nga vendi, konfirmon BBC.
Presidenti është zotuar të dorëhiqet të mërkurën, por më parë ka vendosur të largohet edhe fizikisht nga vendi, ndoshta i frikësuar për jetën.
Populli i Sri Lankës e fajëson presidentin për krizën e rëndë ekonomike të vendit. Ata janë përballur me mungesa të përditshme të energjisë elektrike, dhe mungesa të ushqimeve bazë, karburantit dhe ilaçeve.
Sri Lanka është një shtet i cili udhëhiqej nga Gotabaya Rajapaksa dhe familja e tij, kryesisht vëllezërit e tij. Presidenti ka fuqi të shumta si kreu i shtetit, qeverisë dhe ushtrisë.
