Rasti i 29-vjeçares në Shijak që vuan nga një sëmundje e shëndetit mendor (skizofreni) arrin të marrë një reagim nga bashkia e Shijakut. Gazetarja e emisionit “Stop” në Tv Klan cakton një takim me kryebashkiakun e Shijakut Elton Arbana dhe stafin e tij, Atalanta Balliu, përgjegjëse e Zyrës së Përkujdesit Social, Daniela Deda, administratore shoqërore, Anisa Ndërjaku administratore shoqërore e njësisë Gjepalaj, bashkia Shijak, të cilët shpjegojnë se për këtë rast, kanë shkuar në shtëpinë e vajzës.
Zyrtarët e bashkisë thonë se janë interesuar në disa qendra rezidenciale, por asnjëra nuk e ka pranuar sepse Gerta është 29 vjeç dhe kriteri i pranimit është deri në moshën 21-vjeçare. Ata shtojnë se në shtëpinë ku jeton Gerta është konstatuar vetëm varfëri ekstreme, por nuk mungon kujdesi i babait si dhe nuk ka shenja dhune.
Gazetarja flet me zëdhënësen e Shërbimit Social Shtetëror së cilës i kërkon të shqyrtojnë rastin dhe të bëhet një përjashtim për 29-vjeçaren.
Zëdhënësja e Shërbimit Social Shtetëror: Ma ço të shkruar me email a si të duash ti, në WhatsApp dhe ta shikojmë!
Zyrtarët e bashkisë takohen me të atin e vajzës. Ky i fundit kërkon që vajza të sistemohet në një qendër në Durrës apo Tiranë që ta ketë afër në mënyrë që të mund ta vizitojë.
