Qeveria ka shpallur “Dëshmor të Atdheut” kapitenin Arben Anamali, i cili humbi jetën pak ditë më parë ndërsa u shpëtonte jetën dy turistëve në Shkodër.
Këtë e ka bërë të ditur vetë kryeministri Edi Rama përmes një postimi në rrjetet sociale.
“U PREHSH NË PAQE DËSHMOR I ATDHEUT
Nderojmë me mirënjohjen më të lartë të Republikës, Kapiten Arben Anamalin, drejtuesin e anijes turistike të Bashkisë Shkodër që sakrifikoi jetën e tij për të shpëtuar jetën e dy turistëve në Liqenin e Shkodrës.
I paharruar, Kapiten Arbeni”– shkruan kryeministri në një postim në Facebook.
Ngjarja tragjike ndodhi pasditen e të martës, më 8 korrik, në liqenin e Shkodrës, teksa kapiteni i anijes Arben Anamali tentoi të shpëtonte dy turistë që kishin rënë në ujë, por nuk ja doli të shpëtojë vetë. Fatmirësisht nga ngjarja kanë shpëtuar dy turistët, të cilët ndodhen në gjendje të mirë shëndetësore.
Për këtë rast pati reaguar presidenti Bajram Begaj, i cili shkroi në rrjetet sociale për heroin e ngjarjes: “Dëshmoi një model shoqëror dhe shpirt heroik. Jam pranë familjarëve të tij në këto momente të vështira dhimbjeje”.
