Kreu i qeverisë Edi Rama ka folur me tone pozitive për Presidentin Meta dhe qëndrimet e mbajtura prej tij gjatë gjithë kohës së përhapjes së koronavirusit në Shqipëri. Në intervistë për News24, Rama tha se Meta ka mbajtur një pozicion për t’u respektuar dhe shumë konstruktiv. Madje Rama tha se nuk është koha të diskutohen përplasjet mes qeverisë e Presidencës por se me çfarë përballemi sot.
“Përplasjet e mëparshme kanë qenë të diktuara nga pozicionet e mëparshme, e po të ktheheshim nuk do i ndryshimin asgjë pozicioneve tona. Pozicioni i Presidentit në këtë situatë nuk le asgjë për të dëshutuar, ka qenë në rolin e tij dhe me një përmasë përgjegjshmëri dhe është për t’u respektuar plotësisht.
Mos të merremi se çfarë iku, por me çfarë kemi sot, e të shohim çfarë vjen. Nuk po luftojmë për vota, por po luftojnë për jetën e njerëzve. Po të shohim nëpër botë, të gjitha opozitat që kanë vijuar këngën e vjetër kanë humbur pikë. Presidenti që ishte bërë më para njësh me opozitën, tani është bërë njësh me popullin. Po bën gjënë e duhur dhe respekt për këtë që po bën”, tha Rama.
