Është mbyllur pas 3 orësh takimi i kryeministrit Edi Rama me Këshillin Koordinues të veriut në Velipojë. Burime për Ora News raportojnë se gjatë mbledhjes Rama deklaroi që do largohen 80% e drejtorëve.
“80% e drejtorëve do largohen. Për të gjitha bashkitë e qarkut Shkodër do ketë vlerësim performance të institucioneve me varësi nga qendra. Njëkohësisht do ketë analizë të buxhetit të bashkive, borxheve dhe projekteve aktuale që të evidentohet se ku jemi aktualisht,”-mësohet të ketë thënë kryeministri.
Të pranishmit në mbledhje u treguan të rezervuar për të zbuluar detaje ndërkohë një nga koordinatorët e Këshillit Koordinues të Veriut pasi doli nga mbledhja u shpreh: “Kemi diskutuar për çështjet e rendit të ditës”
Ndersa deputetja Senida Mesi u shpreh: Këto janë mbledhje rutinë, për përmirësimin e performancës së shërbimeve, çështjet e buxhetit
Takimi i nisur paradite
Takimi i nisur prej orës 10:00 u zhvillua në një nga hotelet në zonë.
Në takim ishte dhe ministri i Brendshëm Sandër Lleshaj, i cili ka dhe detyrën e koordinatorit politik i qarkut të Lezhës si edhe deputeti Tom Doshi.
Në sy ra mungesa e deputetit socialist Ditmir Bushati.
Gazetari i RTV Ora Bepin Kolvata informoi se në takim ishin edhe 4 koordinatorët që Rama përcaktoi për të drejtuar politikisht këtë qark pas largimit të Valdrin Pjetrit, i cili rezultoi i dënuar në Itali.
“Axhenda e takimit pritet të jetë e gjatë dhe kryefjalë do të jetë situata politike në qarkun e Shkodrës. Situata është komplekse se kryeministri Rama shkarkoi drejtorët rajonalë dhe socialistët nuk po gjejnë konsensus emërimet e reja” informon gazetari i RTV Ora Bepin Kolvata
Një tjetër temë diskutimi pritet të jetë dhe cështja e kryebashkiakut të Vau i Dejës, Mark Babani. Ky i fundit dorëzoi gjurmët e gishtave në prokurori pas denoncimit të PD se ka qenë i ndaluar në Itali.
