/ATSH/ – Vetëm pak pallate edhe shtëpi të dëmtuara nga tërmeti i 26 nëntorit janë të pariparueshme. Lajmin e bëri të ditur vetë kryeministri Rama nga Kamza, ku bashkë me kreun e bashkisë Rakip Suli bashkëbiseduan me banorët.
“Janë një pjesë pallatesh që janë të vjetra, me çati, që kanë problematikë të mbartur në vite edhe nga lagështira por rrezik shembje nuk kanë si strukturë. Këtu janë rreth 15-20 pallate ndërsa në këtë kompleks janë 6”, – tha kreu i bashkisë së Kamzës. Kryeministri Rama u tha banorëve se më e keqja kaloi dhe se e rëndësishme është që nuk ka rrezik.
“Do bëjmë inspektimet e të ndajmë kush do prishet, kush duhet riparuar. Shumica janë për tu riparuar por një pjesë do prishen për tu bërë të reja. Me këtë rast do bëhet dhe rehabilitimi i zonës.”, – u tha Rama banorëve të Kamzës.
Para se të largohej për në Durrës, Kryeministri i rekomandoi banorëve: “shikoni sa më pak televizor këto ditë po patët mundësi dhe të paktën shmangni debatet e mbrëmjes, ku pjesën më të madhe të kohës flitet përçart”.
